தமிழ் சினிமாவில் முன்னணி சினிமா குடும்பத்திலிருந்து வருகிறவர்கள் எவ்வளவு செல்வாக்கோடு இருப்பார்கள் என்பதற்கு சூர்யா, கார்த்தி, விஜய் ஆகியோர் உதாரணமாக இருந்தாலும் இவர்கள் ஆரம்பத்தில் வாரிசு அடையாளத்தோடு அறிமுகமாகி கடுமையாக உழைத்தே தங்கள் இடத்தை பிடித்தார்கள்.

ஆனால் அன்னை இல்லத்தில் இருந்து வந்திருக்கும் பிரபுவின் மகன் விக்ரம் பிரபு, கார்த்திக் மகன் கவுதம் ஆகியோரின் வாரிசு பலத்தை கண்டு சினிமா வட்டாரமே ஆச்சர்யத்தில் திகைக்கிறது.

விக்ரம் பிரபு கும்கி படத்தில் அறிமுகமானார். கஷ்டப்பட்டு நடித்தார் படமும் வெற்றி பெற்றது. அதை தொடர்ந்து இப்போது எங்கேயும் எப்போதும் சரவணன் டைரக்ஷனில் இவன் வேற மாதிரி படத்தில் நடிக்கிறார். லிங்குசாமியின் திருப்பதி பிரதர்ஸ் நிறுவனம் தயாரிக்கிறது. சுரபி ஹீரோயின். அடுத்து யுடிவி தயாரிக்கும் சிகரம் தொடு படத்தில் நடிக்கிறார். தூங்கா நகரம் டைரக்ட் பண்ணிய கவுரவ் இதனை டைரக்ட் செய்கிறார். மோனல் கஜ்ஜார் ஹீரோயின். அடுத்து அரிமா நம்பி. கலைப்புலி தாணு தயாரிப்பில் ஆனந்த் சங்கர் டைரக்ட் பண்ணுகிறார். பிரியா ஆனந்த் ஜோடி. அடுத்த படத்தை விக்ரம்பிரபுதான் ஒத்துக் கொள்ளவில்லை. அட்வான்ஸ் கொடுப்பதற்கே ஆறேழு தயாரிப்பாளர்கள் வரிசையில் நிற்கிறார்கள்.

விக்ரம் பிரபுவாவது பரவாயில்லை ஒரு ஹிட் கொடுத்தார். ஆனால் கார்த்திக் மகன் கவுதமிற்கோ முதல் படம் கடல் ஃபிளாப். ஆனாலும் அவருக்கு திரும்பிய பக்கமெல்லாம் வாய்ப்புகள் குவியுது. சரவணன் என்பவர் இயக்கும் சிப்பாய் படத்தில் நடிக்கிறார். ராசி நடிகை லட்சுமி மேனன் ஹீரோயின். ரவி பிரசாத் ஸ்டூடியோ தயாரிக்க ரவி தியாகராஜன் இயக்கும் என்னமோ ஏதோ படத்தில் நடிக்கிறார். நிகிஷா படேல், ரகுல் ப்ரீத்தி என இரண்டு ஜோடிகள். ரஜினி மகள் ஐஸ்வர்யா தனுஷ் இயக்கும் வை ராஜா வை படத்தில் நடித்து வருகிறார். ப்ரியா ஆனந்த் ஜோடி. இதுதவிர உதயம் என் எச் 4 படத்தை இயக்கிய மணிமாறன் இயக்கும் நானும் ரவுடிதான் படத்தில் நடிக்கவும் கமிட் ஆகியிருக்கிறார். இன்னும் பல தயாரிப்பு நிறுவனங்கள் கவுதம் கால்ஷீட்டுக்காக காத்திருக்கின்றன.

வாரிசு என்ற பலம் இவர்களுக்கு வாய்ப்புகளை அள்ளிக் கொடுத்தாலும் அடுத்தடுத்து வெளியாகும் படங்களில் இவர்கள் வெளிப்படுத்தியிருக்கும் திறமைதான் அவர்களின் எதிர்காலத்தை தீர்மானிப்பவையாக இருக்கும்.