டீல் படத்துக்கு டப்பிங் கார்த்திகா எஸ்கேப்

    டீல் படத்தில் கார்த்திகா டப்பிங் பேசாததால் அவருக்கு பாடகி சின்மயி குரல் கொடுக்கிறார். கோ படத்தையடுத்து அன்னக்கொடி படத்தில் நடித்தார் ராதா மகள் கார்த்திகா. இதையடுத்து அருண் விஜய் நடிக்கும் டீல் படத்தில் நடித்து வருகிறார். சிவஞானம் இயக்குகிறார். இதன் ஷூட்டிங் சமீபத்தில் முடிந்தது. இப்படத்தின் டப்பிங் பணி நடந்து வருகிறது.

இன்னும் 4 நாட்களில் அருண் விஜய் டப்பிங் பேசி முடிக்க உள்ள நிலையில் தனது கதாபாத்திரத்துக்கு கார்த்திகா டப்பிங் பேசுவார் என்று எதிர்பார்க்கப்பட்டது. ஆனால் திடீரென அவர் பின் வாங்கியதாக கூறப்படுகிறது. இதனால் தற்போது அவருக்கு பின்னணி பாடகி சின்மயி குரல் கொடுக்கிறார். இதற்காக 20 நாட்களுக்கான டப்பிங் பணி தொடங்குகிறது.

சுகுமாரன் இப்படத்தின் ஒளிப்பதிவு செய்ய தமன் இசை அமைத்திருக்கிறார். ஏற்கனவே சின்மயி நடிகை அனுஷ்கா நடிக்கும் படங்களில் அவருக்கு டப்பிங் குரல் கொடுத்து வருகிறார்.