நீண்ட நாட்களுக்கு பிறகு ஒரு வெற்றியை ருசித்திருப்பதால் உற்சாகத்தில் இருக்கிறார் விஷால். பாண்டியநாட்டுக்கு கிடைத்திருக்கும் பரவலான வரவேற்பால் நெகிழ்ந்து போயிருக்கிறார். இதனால் எல்லா வேலைகளையும் ஒதுக்கி வைத்துவிட்டு டைரக்டர் சுசீந்திரனை அழைத்துக் கொண்டு தியேட்டர் உலா சென்று கொண்டிருக்கிறார். சென்னை தவிர்த்து பாண்டிய நாடு திரையிடப்பட்டுள்ள அனைத்து முக்கிய நகரங்களுக்கும் செல்ல திட்டமிட்டிருக்கிறார்.
வேலூர் சென்ற விஷால் அங்கு தியேட்டரில் ரசிகர்களை சந்தித்துவிட்டு நிருபர்களிடம் கூறியதாவது: தமிழ்நாடு முழுவதும் பாண்டியநாடு பெரிய வெற்றியை பெற்றுள்ளது. தெலுங்கிலும் நல்ல வரவேற்பு கிடைத்திருக்கிறது. தமிழ்நாட்டில் முதலில் 350 தியேட்டர்களில் திரையிட்டோம். இப்போது கூடுதலாக 75 தியேட்டர்களில் திரையிட்டுள்ளோம். எனது வாழ்க்கையில் பாண்டியநாடு முக்கியமான படமாக இருக்கும். இந்த வெற்றியை தந்த அத்தனை பேருக்கும் என் மனமார்ந்த நன்றியை தெரிவித்துக் கொள்கிறேன். இதுவரை கடலூர், சிதம்பரம், புதுச்சேரி பகுதிகளுக்கு சென்ற வந்திருக்கிறேன். அடுத்து திருச்சி, கோவை, மதுரை, நெல்லைக்குச் செல்ல இருக்கிறேன். அடுத்து நான் சிவப்பு மனிதன் படத்தில் நடிக்கிறேன். அடுத்த ஆண்டு ஏப்ரல் மாதம் ரிலீசாகும். மதகஜராஜா எப்போது ரிலீசானலும் ஹிட்டாகும்.
இவ்வாறு விஷால் கூறினார்.
